طبعا لو حسبت هنا ما يدفع مقابل المشاهدة هتلاقيه مبلغ خرافى وهنا بيضرب اكثر من عصفور بحجر واحد
1- ارتفاع تكلفة المشاهدة تضمن تحسين جودة البث بشكل كبير وعرض برامج متميزة
2- حصول الاندية على مقابل مالى كبير جدا يبدا من حوالى 100 مليون يورو فى حالة البطل و تبدا المبالغ فى التناقص مع الترتيب حتى يكون الهابط الى دورى الدرجة الثانية الخاسر الاكبر ماديا
3- وهو الاهم ارتفاع التكلفة يجلب المتفرجين الى الاستاد على اساس ان ما يدفعه يتجاوز تكلفة ذهابه الاستاد وعليه نجد ان الاندية تستفيد ماديا من عائد التذاكر و حقوق البث وايضا الاعلانات

طبعا هنا هيجى سؤال ليه اتحاد الكورة الاسبانى هو اللى باع وليه ريال مدريد ماخدش المباريات على قنواته

ملحوظة هامة : من موسمين تقريبا اعترض فريق برشلونة على حق اللى كان بيحصل عليه من اذاعة مبارياته ووقف بث مبارياته تماما لحين تعديل العقد ( يعنى من حق اى فريق يوقف بث مبارياته يعنى ، يعنى بالتبعة حق الفريق فى التحكم فى مبارياته وليست من حق الاتحاد كما يشاع )

هاوضح هنا فرقين

الفرق الاول: ان الفرق فوضت الاتحاد الاسبانى بالتعاقد مع القناة ، مثلما حدث مع الدورى المصرى بالظبط على ان يجلب لها عائدا ماديا جيدا ومرتفعا وهذا العائد لفريق مثل ريال مدريد يفوق ما يمكن ان يكسبه من من عائد بيع مبارياته حصريا على قناته ، يعنى بالبلدى كده ريال مدريد وبرشلونة لقى ان اكسبله ماديا ان يبيع مع الاتحاد الاسبانى لقناة واحدة هتدخله مبلغ كبير احسن ما يبيع هو على قناته ( وهو من حقه على فكرة )

الفرق الثانى: ان النادى الاهلى دى لا تعتبر قناته بل النادى اسس شركة اعلامية مساهمة لها اسهم قامت بانشاء قناة النادى الاهلى وباع النادى الاهلى مباراته لهذه القناة ، يعنى برده بالبلدى لو فرضنا مثلا ان قناة مودرن راحت للاهلى وقالته انا عايز اشترى ماتشاتك انت ب 60 مليون جنيه ولقى ان المبلغ ده اكتر الفلوس اللى تدخل من القناة يبقى ممكن يبيعلها ، يعنى القناة ليست قناة تابعة للنادى الاهلى والا كانت تصبح تابعة للمجلس القومى للرياضة وانما هى شركة منفصلة حصلت على ترخيص باستخدام اسم الاهلى واستغلاله لانشاء قناة وباع لها الاهلى مباراته ( ارجو ان تكون واضحة النقطة دى)

فيه بقى نقطة مهمة جدا وهى ان مفيش فى اوربا الكلام اللى بنسمعه بتاع المواطن الغلبان وحق المواطن الغلبان والمغتربين ، طبعا هو بيحصل فى مصر لاسباب كثيرة وانا اؤيدها على فكرة نظرا للظروف والحالة التى بمر بها اغلب المصريين ، يعنى عموما دى نقطة تانية فارقة بينا وبين الدورى الاسبانى

على فكرة الدورى الانجليزى مش بيتذاع كل مبارياته معظمها بيتسجل يعنى اللى بتعمله قناة زى الشوتايم ده مش بيحصل اصلا فى انجلترا
نروح بقى للدورى اليونانى قبل ما انتقل للمقارنة بين ما حدث للاهلى وما حدث فى الدورى الايطالى
الدورى اليونانى نفس الكلام تقريبا مع فارق بث ان المباريات تبث على قناة اسمها Super sport وهى مشفرة والمباريات تبث ايضا حصريا مع بث مباراة واحدة فقط ارضيا ، وطبعا ليست من مباريات القمة يعنى ولكن بدون نظام ال Pay per view اللى ماشى فى اسبانيا

نروح بقى للى حصل فى لدورى الايطالى
فى نهاية الموسم قبل الماضى اعترضت 10 فرق من فرق الدرجة الاولى منهم ( ريجينا وبارما وفيورنتينا و نابولى وسيينا واريزو و غيرهم ) على مقابل البث التلفزيونى الذي يحصلوا عليه من الاتحاد الايطالى خاصة المبلغ المخصص لفرق المراكز المتاخرة ومعهم بعض الفرق من الدرجة الثانية وطبعا كان اولها فريق اليوفنتوس الذى هبط وقتها للدرجة الثانية
حصل ايه؟؟؟
الفرق دى طلبت الانسحاب من حقوق البث التى تحصل عليها من الاتحاد وقامت هى ببيع مباراتها على ملعبها بمعرفتها هى وهو ما ادى الى مشكلة كبيرة خاصة مع العقود الخارجية ولو نتذكر ان قناة الجزيرة الرياضية كانت قد اشترت حقوق الدورى الايطالى كاملا ولكن بعد سنتين وفى الموسم الماضى قامت الايه ار تى بشراء حقوق بث مباريات هذه الفرق على ملعبها من الفرق نفسها وبذلك توزع الدورى الايطالى على قناتين فى منطقة واحدة والطريف ان هذه الفرق قامت بنفسها ببيع مبارياتها لقناة السكاى بمعرفتها بدون وساطة الاتحاد الايطالى وقناة سكاى هى التى اشترت من الاتحاد
يعنى بتوضيح اكتر الاتحاد باع مباريات 10 فرق اللى فوضوه و10 فرق باع كل منهم بمفرده وكان من حق اى فريق انه يبيع لاى قناة تانية سواء قناة خاصة به او قناة منافسة او حتى قناة سكاى الايطالية كما قامت الفرق ببيع وتسويق مبارياتها خارجيا لقنوات غير التى تنقل الدورى الايطالى نفسه

اذن نستخلص من هذا الموضوع نقاط هامة :
1- من حق فرق الدورى تفويض الاتحاد فقط وليس من حق الاتحاد التحكم فى البيع ويكون طبعا الاتحاد امينا ويحقق مبيعات عالية جدا يمكن عرض مبالغ ضخمة على الفرق تغنيها عن بيع مباريتها لقنواتها اى انه برضه ليس فرضا على فرق الدورى بيع مباريتها للاتحاد فقط ( الفرق بتشوف مصلحتها من الاخر )

2- المبالغ المحصلة من بيع الدوريات الاوربية مبالغ خيالية جدا لان قناة واحدة تحتكر بث المباريات لصالح نفسها ولصالح الغير كمان يعنى مثلا ( قناة مودرن مثلا اشترت الدورى المصرى حصريا ارضي وفضائيا مقابل مليار جنيه ، يمكن ان تبثه على قنواتها او تبيعه لقنوات مثلا فى السعودية والاردن او حتى اوربا ) طبعا ده مش هيحصل لضعف المنتج اساسا بالاضافة الى سياسة الدولة العامة فى عدم بيع المباريات بل يكون البيع والنقل الاساسى عن طريق اتحاد الاذاعة والتلفزيون

ملحوظة : لا يسمح اتحاد الاذاعة والتلفزيون بتاتا بدخول اى كامير الى ارض الملعب من اجل البث غير كاميراته هو وعن طريق وحداته هو ( مش عارف ليه ) بس ده طبعا قرار سيادى وجاى من فوق

3- البث التلفزيونى فى كل العالم يكون وسيلة من وسائل الدخل للنادى تمكنه من الصرف على النادى ، وايضا تكون وسيلة تنافسية لان الاول بياخد مبلغ اكثر من الثانى اللى بياخد اكثر من الثالث وهكذا

==

انتهى موضوع الزميل طائر الحب الحزين .. وبإذن الله حأحاول أرجع له تاني في الموضوع القادم لأهميته بالنسبة لي ويمكن بالنسبة لك، غير المعلومات المهمة التي توصلت لها من بحثي أو كلام آخرين مرتبطين جدا بالدوريات الأوروبية. الشجار بين الأندية الإيطالية مهم جدا كما أن بعض الدوريات العربية وما تقدمه من حالات مماثلة ممكن يورينا تعامل عدة أطراف مع قضية البث الحصري بنموذج يكاد يتطابق مع الحاصل في مصر.